Ginkontra ni PCOL. Kim Legada ang nangin pahayag ni Department of Interior and Local Government Secretary Jonvic Remulla nga masobra 36 ka-oras antes pa nga magresponde ang kapulisan sa ginpahayag nga gun fire incident ni Dueñas Vice Mayor Lamasan nga gintunaan sang kamatayon sini.
Sa interview sang Bombo Radyo kay PCOL. Legada, Police director sang Iloilo city Police Office, iya ginpahayag nga matapos nila nga nahibaluan ang natabo, nagsugod naman sila sa pag-imbestigar kun sa diin gintinguhaan man nila nga mag-istorya kay Vice Mayor Lamasan samtang yara ini sa ospital kag amo man sa pamilya sini.
Ginklaro man niya nga wala mapatigayon sang Scene of the Crime Operatives (SOCO) ang ila nga imbestigasyon bangud nga ginsanitize na ang area kun sa diin ini natabo kag ginturn-over na lang sa imbestigador ang armas.
Dugang pa niya nga ginapangunahan na sa subong sang Criminal Investigation and Detection Group (CIDG) ang imbestigasyon kun sa diin nagapakig-angot man ang Iloilo City Police Office.
Suno sa iya nga ila pa paga-imbestigaran ang nangin tikang sang mga personnel sang La Paz Police Station sa insidente.
