Ginsukot sang Senado ang Philippine Charity Sweepstakes Office (PCSO) sang pangalan sang mga nagdaog sa lotto kasunod sang pagguwa sang edited nga laragway sang Lotto 6/42 jackpot winner sang damlag lang.
Suno kay Senator Raffy Tulfo, sa senate executive session, kinahanglan nga may pangalan na nga ihatag bangud madamo ang nagasiling nga taga-PCSO man mismo ang nagdaog sang jackpot.
Nagsabat naman ang general manager nga mahimo nila ihatag ang mga pangalan kun iga-subpoena sila.
Sang ulihi, nagpanugyan si Senate Minority Leader Aquilino “Koko” Pimentel nga limitahan lamang ang mga myembro nga makatambong sa executive session agud malikawan nga mag-leak ang impormasyon nga ihatag sang PCSO.
Ginpahayag pa ni Tulfo nga i-check sini ang mga identity sang mga nagdaog agud nga mauntat na ang mga huring-huring nga may empleyado mismo ang PCSO nga amo ang ginpadaog.
Antes sini, sa amo man nga inquiry, gin-ako ni PCSO General Manager Melquiades “Mel” Robles nga gin-edit nila ang picture antes gin-post agud ma-protektahan ang identity kag privacy sang tagdaog.
Ini nga edited photo amo suno sa ila ang winner halin sa San Jose Del Monte, Bulacan nga nag-claim sang Lotto 6/42 jackpot balor P43.8-million sa PCSO Main Office sang Disyembre 28, 2023.
