May palaabuton nga isa na naman ka long weekend!
Gindeklarar sang Malacañang ang Pebrero 9, Byernes nga adlaw, nga isa ka special non-working holiday bilang selebrasyon sang Chinese New Year.
Suno sa proklamasyon nga ginpirmahan nanday President Ferdinand Marcos Jr. kag Executive Secretary Lucas Bersamin, ini nga deklarasyon ang magahatag sa mga tawo sang oportunidad nga maka-selebrar sang Chinese New Year kag mahatagan man sang tyansa ang mga Pinoy nga makaangkon sang mas malawig nga weekend.
Sa sini man nga proklamasyon, ginmanduan ang Department of Labor and Employment nga magpaguwa sang kaangot nga circular agud mapatuman ang nagakaigu nga holiday pay sa pribado nga sektor.
Antes sini, may yara man sang Proclamation No. 368 nga napetsahan sang October 11, 2023 nga naga-deklarar sang February 10, 2024, (Chinese New Year), Sabado, bilang isa man ka special non-working day sa bilog nga pungsod.
Isa ka festival ang Chinese New Year nga naga-selebrar sang pagsugod sang bag-o nga tuig base sa traditional lunisolar Chinese calendar. #
