ILOILO CITY- Magabayad na ang Panay Electric Company sang ila nga utang sa real property tax sa Iloilo City Government.
Sa interview sang Bombo Radyo kay Atty Eloisa Sy, legal counsel sang Panay Electric Company, iya ginkumpirma ang pagbayad nila sa syudad matapos ang ginpatigayon nga closed door meeting kaupod sanday Iloilo City Mayor Jerry Treñas kag si Marcelo Cacho, Administrative Manager sang nasambit nga kompaniya.
Suno kay Atty. Sy, may yara na sang kasugtanan sa tunga sang syudad kag Panay Electric Company apang indi pa sila makabayad subong nga adlaw bangud nga hulaton pa nila nga ratipikahan kag aprubahan sang Iloilo City Council ang balor sang kwarta nga ibayad.
Sa inisyal nga impormasyon gikan sa Iloilo City Government, may kabilugan nga P134 million ang dapat bayaran sang Panay Electric Company
sa diin P59 million ang principal payment kag P75 million naman ang second kag third assessment santo sa ila nga properties lakip na ang poste kag linya sang kuryente.
Ginpahayag ni naman kay Atty. Sy nga wala pa sang final data kag detalye kun pila gid man ang ila bayaran.
