ILOILO CITY- Ginbasura sang Sangguniang Panlungsod ang hingyo ni Iloilo City Mayor Jerry Treñas nga magpasar sang resolusyon nga magahatag sa alkalde sang otoridad nga magpirma sang Memorandum of Agreement sa tunga sang Iloilo City Government kag Iloilo Festivals Foundation Inc. nga mangin official partner sang syudad nga magauyat sang mga major festivals.
Sa interview sang Bombo Radyo kay Iloilo City Councilor Eduardo Peñaredondo, iya ginpahayag nga base sa “Guidelines on Accreditation of Civil Society Organizations and Selection of Representatives to the Local Special Bodies’ sa idalom sang Memorandum Circular No. 2019-72 , indi mahimo nga ma-accredit ang Iloilo Festivals Foundation Inc. bangud wala ini nagsunod sa guidelines base sa gina-prescribe sang Local Government Code.
Suno kay Peñaredondo, nasaad sa guidelines nga ang isa ka organisasyon ang dapat may yara sang project development kag implementation track record sang indi magnubo sa isa ka tuig.
Magluwas diri, ginpahayag man sang konsehal nga napaslawan man ang Iloilo Festivals Foundation Inc. nga magpasa sang ila financial records sa City Council.
Matandaan nga kahapon lamang nagsumpa ang mga officers sang Iloilo Festivals Foundation Inc. nga nagbulos sa gindula nga Iloilo Dinagyang Foundation Inc.
Kaangot sini, magapatawag sang special session si Iloilo City Mayor Jerry Treñas.
Sa interview sang Bombo Radyo kay Mayor Treñas, iya ginpahayag nga sa nasambit nga session, iya i-provide ang tanan nga mga dokumento nga kinahanglan sang konseho agud aprubahan ang iya hingyo nga hatagan siya sang otoridad agud magsulod sa Memorandum of Agreement upod sa Iloilo Festivals Foundation Inc.
Paathag sang alkalde, bangud nga gindalian lamang ang nasambit nga Memorandum of Agreement, wala gilayon mahatag ang kopya sini sa mga katapo sang konseho rason nga wala ini maaprubahan.
May kaangtanan naman sa nabutang sa guidelines nga ang isa ka organisasyon ang dapat may yara sang project development kag implementation track record sang indi magnubo sa isa ka tuig antes ma-accredit, ginpahayag ni Treñas nga indi ini mahimo i-apply sa Iloilo Festivals Foundation Inc. bangud ang ano man nga cash reward nga ihatag sang Iloilo City Government ang indi na magaagi sa Iloilo Festivals Foundation Inc. kag magadiretso na ini sa mga tribu nga magapasakop sa Dinagyang Festival 2020.
