Nagdangat na sa 42 ka mga Ilonggo overseas Filipino workers (OFWs) sa Middle East ang na-profile sang Iloilo Provincial Government nga nag-request sang repatriation bangud sang epekto sang gyera.
Sa interview sang Bombo Radyo kay Cynthia Dario, head sang Provincial Public Employment Service Office (PESO), iya ginpahayag nga nabalaka na ini nga mga Ilonggo sa ila sitwasyon sa tunga sang nagasingki nga tensyon.
Dugang sini, daku man ang nangin epekto sang kinagamo sa ila mental health.
Sa mga naghingyo nga mabuligan sila nga makapauli, pinakamataas ang halin ang Kuwait nga may 12 workers.
May requests man halin sa mga Ilonggo sa United Arab Emirates, Qatar, Saudi Arabia, Jordan, Bahrain, Lebanon, kag Israel.
Suno kay Dario, napasaka na ang repatriation requests sa Department of Migrant Workers (DMW) para nga ma-proseso na.
Sa data sang PESO, masobra sa 12,300 ang mga Ilonggo nga naga-trabaho sa nagkalain-lain nga mga pungsod sa Middle East. Kadam-an sa mga trabaho sa amo nga rehiyon amo ang sa sector sang domestic work, healthcare, construction, kag retail.
Pebrero 28, 2026 sang nag-umpisa ang gyera matapos nga nag-atake ang US kag Israel sa Iran nga nagpatay sa Supreme Leader kag iban pa nga senior military kag defense officials sang Tehran. Gilayon nga nagbalos ang Iran paagi sa pagpalupad sang missiles kag drones sa mga pungsod sa rehiyon kun sa diin nahamtang ang military bases sang Estados Unidos.#
