Indi lang basta-basta nga mapauntat gilayon ang quarry operation sa probinsya kun may report nga mabaton nga iligal nga ini nga ginapatigayon.
Sa interview sang Bombo Radyo kay Iloilo Governor Arthur Defensor, Jr., iya ginpahayag nga may proseso nga ginasunod ang Provincial Government Environment and Natural Resources (PGENRO).
Dapat nga i-verify anay ang report suno kay Defensor, imbestigaran, kag pauntaton lang kun makaagi na sa husto nga pagpangusisa.
Tatlo na ka illegal quarry operation ang nadakpan sang provincial government halin sang Enero subong nga 2022.
Madamo pa ini suno sa gobernador bangud pila sa permitees ang nagalapaw sa parameter nga yara sa ila ginauyatan nga permit.
Ginapasigurado sang PGENRO nga bisan pagpanghangkat para sa ila ang pagbantay, ma-eksido gid ang monitoring kag madakpan kun sin-o nga permittee ang nagapataka kag nagapahapos lang sa ila nga trabaho sa quarry site.
