Magapakigkita ang ambassador sang Pilipinas sa Israel kay Israeli President Isaac Herzog kag ginalauman nga personal sini nga hingyuon nga tugutan ang masobra 100 ka mga Pinoy nga safe nga maka-guwa sa Gaza Strip.
Suno kay Foreign Affairs Undersecretary Eduardo de Vega, ang natalana nga meeting isa lamang ka courtesy call ni Ambassador Pedro Laylo Jr. sa presidente apang i-mensyonar suno sa iya ang ikaayo sang mga Filipinos sa Gaza ilabi na bangud antes sini, nakilala na ang Filipino workers sa Israel bangud sa pagkabaganihan kag dedikasyon sa trabaho.
Una na nga nagpadala sang sulat ang Department of Foreign Affairs (DFA) sa foreign ministers sang Israel kag Egypt nga nagahingyo nga mag-isyu sang permits para sa hilway nga paglabay sang mga Filipinos sa Rafah Border.
Nag-request man ang ahensya nga maka-istorya sa Israeli foreign minister agud ma-follow up ang sulat kag mapatabok na ang mga Pinoy padulong sa Egypt.
Nahibaluan nga sang temporaryo nga ginbuksan ang Rafah border sang Myerkules sang hapon, duha pa gid lamang ka Pinoy doctos ang lakip sa una nga batch sang foreigners nga gintugutan nga makaguwa sa amo nga teritoryo sang Palestine.#
