Nagapanawagan ang netizens kay Phillip Salvador, amay ni Josh Aquino, nga magpagwa man sang statement kag depensahan ang iya anak kasunod sang kontrobersyal nga mga pahayag sang mga host sang “Machong Chismisan” podcast.
Nag-ugat ini matapos ang episode nga gin-release sang Oktubre 5 kun sa diin mabatian ang masakit nga mga komento kag pagpangyaguta sa subang nga anak ni Kris Aquino. Gintawag pa sang isa sa ila si Josh nga “walang kwenta.”
Bisan ginkakas na ang nasambit nga episode sa ila social media page, may mga bahin sang video nga gin-repost na sang nagkalain-lain nga netizens sa social media.
Kasunod sang kontrobersiya, wala-tuo nga celebrities kag public figures ang nagpakita sang suporta kay Josh kag nagkondenar sa hosts sa podcast, apang may isa ka pangalan nga talalupangdon nga ginapangita sang publiko: si Phillip.
Yari ang pila sa mga komento sang netizens:
“Hoy Phillip Salvador! Maging tatay ka naman sa anak mo. Ipagtanggol mo!”
“Asan ba si Ipe? Baka ngayon pwede namang magsalita sa isyu ng anak mo. Bumawi ka naman sa ilang taong wala ka.”
“Ito na lang pwede mong maambag kay Kuya Josh! Maging tatay ka naman kahit ngayon lang.”
“Baka lang naman maisip mong magtatay-tatayan. It’s your time to shine.”
“Ano kaya reaksyon ni Phillip nito…ito maganda abangan.”
“Anak ni Philip Salvador ‘yan inaaway n’yo.”
“Buti pa si Boy Abunda nag-react agad pero si Phillip wala lang.”
Nauna na nga nagpangayo sang pasaylo ang hosts sa mga nasakitan, sa komunidad sang mga person with disability (PWD), kag sa mga tawo nga ginmitlang sa programa.
Gin-untat man sang Pod Network ang ila kontrata sa podcast.
“We acknowledge that our conduct was inexcusable, deeply insensitive, and hurtful. We recognize the impact of our actions, and we do not wish to make excuses for the harm we have caused,” suno sa statement sang hosts.
Kasunod sini, ginkumpirma sang National Bureau of Investigation (NBI) nga iga-subpoena ang hosts para sa imbestigasyon.
Sandig sa Republic Act No. 9442 nga nag-amyendar sa Magna Carta for Disabled Persons ukon Republic Act No. 7277, mahimo masilutan sa idalom sang layi ang pagpangyaguta, diskriminasyon, kag pagpakahuya sa persons with disability (PWD).
Ang mapamatud-an nga nakalapas sa sini nga layi mahimo pamultahon sang P50,000 tubtub P100,000 kag mapreso sang anum ka bulan tubtob duha ka tuig para sa una nga paglapas.#
