Ginkwestyon sang pila ka mga punong barangay ang pagpatukod sang mga solar streetlight sang Iloilo City District Engineering Office matapos matukiban nga gintupad ini sa existing streetlights sang syudad sa pila ka barangay sa Iloilo City.
Sa interview sang Bombo Radyo kay Punong Barangay Leo Aristoza sang North Fundidor, Molo, Iloilo City, iya ginpahayag nga wala sang nagluntad nga husto nga koordinasyon antes ginpahamtang ang mga streetlights sa ila barangay.
Suno sa iya, kuntani ginhatagan man sila sang kahigayunan nga magtudlo kun sa diin kinahanglan ibutang ang dugang nga mga streetlights kag indi nga tupadon lamang ini sa malapit nga poste sang una na nabutang.
Suno kay Aristoza, bangud sa kakulangan sang koordinasyon, wala nasalama ang pagtakos sang distansya sang mga solar streetlights, kun sa diin may mga unit nga tuman ka lapit sa isa kag isa.
Ginpahayag man nga nagabalor sang P100 thousand ang tagsa ka unit sang solar streetlight, kag ginabulubanta nga nagalab-ot sa 60 ka streetlights ang natukod na.
Suno pa sa impormasyon, yara sa 365 ka units ang quota sang mga streetlights nga kinahanglan kuntani ma-install sa nasambit nga lugar.
Ang kontraktor amo ang kompaniya nanday Curlee kag Sarah Discaya.
Ginapanawagan naman sang mga barangay officials ang mas klaro kag husto nga koordinasyon agud malikawan ang pag-uyang sang pondo kag masiguro nga mapahamtangan ang mga lugar nga nagakinahanglan gid man sang dugang nga streetlight.
