Pilason ang pila ka mga indibidwal matapos magbungguanay ang tricyle kag motorsiklo sa national road sang Barangay East Valencia, Buenavista, Guimaras.
Ginkilala ang mga sakay sang tricycle nga sanday Nema Seva, 63 anyos, isa ka fish vendor, kag si Pepito Seva, 72 anyos, isa ka mangunguma, upod ang ila kapid nga mga kabataan nga naga-edad sang apat ka tuig.
Samtang, ang driver sang motorsiklo amo si Ian Loyd Acebedo, 28 anyos, residente sang Brgy. Tanza Bonifacio, Iloilo City, kag may mga upod ini nga duha ka menor de edad nga lalaki, naga-edad 13 kag 14 anyos.
Suno sa report nga nabaton sang Buenavista Municipal Police Station (BMPS) sang alas 6:08 sa amo man nga adlaw, ang insidente nagluntad malapit sa Kei Gazz Gasoline Station, sa nasambit nga banwa.
Base sa imbistigasyon, wala sang lisensya ang driver sang motorsiklo kag wala man sang may ginasuksok nga helmet.
Padulong kuntani ang motorsiklo sa tindahan agud nga magbakal sang sorbetes, sang hinali lang nga nabungguan sini ang nalikod nga bahin sang tricyle sa kurbada nga parte sang karsada.
Nakaangkon sang pilas sa ulo ang driver sang motorsiklo, samtang ang iya duha ka backrider may gamay man nga pilas sa ulo.
Si Nema Seva naman ang nakaangkon sang pilas sa wala nga tuhod, tuo nga siko, kag ulo, kag maswerte nga wala nasamaran ang duha ka mga kabataan.
Gilayon man ini gindala sa hospital sang first responder nga grupo nanday PLT. Col. Sheila Marie S. Sardoma kag C, PCADU, Guimaras Provincial Office ang mga biktima para sa nagakaigo nga pagbulong.
Ang tricycle kag motorsiklo ang yara na sa kustodiya sang estasyon para sa dugang nga verification, documentation, kag insakto nga disposisyon.
