𝗠𝗔𝗡𝗜𝗟𝗔 — Ginpirmahan na sang Pilipinas kag Singapore ang mga kasugtanan nga magaamlig sang mga kinamatarong sang mga overseas Filipino workers, ilabi na ang mga healthcare workers, subong man sang mga kasugtanan sa pagbuligay sa climate financing.
Ang pagpresentar sang mga ginpirmahan nga mga kasugtanan ginhimo pagkatapos sang bilateral nga pagsinapol nanday Presidente Ferdinand ”Bongbong” Marcos Jr. kag Singaporean President Tharman Shanmugaratnam sa Palasyo sang Malacañang.
Si Shanmugaratnam yara sa Pilipinas para sa tatlo ka adlaw nga pagbisita.
Ginpahayag ni Marcos nga ang Memorandum of Understanding on the Recruitment of Filipino Healthcare Workers ang magapasiguro nga may yara sang balanse sa tunga sang mga kinahanglanon sang healthcare sector sang duha ka pungsod.
Ginsambit man niya ang pagpirma sang Memorandum of Understanding for Collaboration on Carbon Credits Under Article 6 sang Paris Agreement sa tunga sang Department of Environment and Natural Resources kag sang Ministry of Trade and Industry of the Republic of Singapore.
Suno kay Marcos, paagi sa Memorandum of Understanding on the Recruitment of Filipino Healthcare Workers, magasalig ang pungsod sa legal kag hudisyal nga sistema sang Singapore, nga magapat-od nga ang mga kinamatarung, kaayuhan, kag kaayuhan sang mga kababayan OFWs maamligan samtang sila nagapadayon sang ila mga trabaho sa Singapore.
Ang lider sang Singapore, sa iya bahin, nagkilala sang importansya sang biodiversity kon parte sa mga kaangtanan sang duha ka pungsod.
Ginsambit pa niya ang Philippine Eagle nga yara sa katalagman nga madula.
Ginpahayag man sang Presidente sang Pilipinas nga may iban pa nga mga MOU, nga pagapirmahan sang mga yunit sang lokal nga panguluhan sang Pilipinas kag sang mga kasugpon sang pribado nga sektor sang Singapore.
