Magasandig ang gobyerno sang Pilipinas sa foreign lenders subong nga tuig para malab-ot ang mga tinutuyo sini sa development sang nasyon.
Ginapahayag nga magahulam ang Marcos administration sang kabug-usan nga $6.35 billion (ginabanta nga P369.66 billion) halin sa Asian Development Bank (ADB) kag World Bank agud nga may pondo ang mga proyekto.
Ini nga mga inisyatibo magatutok sa pagpaumwad sa urban transit, pag-promote sang climate-resilient agriculture, pagpasangkad pa sang malimpyo nga enerhiya, pagpaayo pa sang sanitation, pagpabaskog sang health and education services, kag pag-upgrade sang rural infrastructure.
Ginaalegar nga pito ka concessional financing packages ang magahalin sa ADB kag siyam naman ang mangin loan sa World Bank apang naka-schedule pa ini nga aprubahan subong nga tuig.
Una na nga ginpahayag ni Department of Finance Secretary Ralph Recto nga nagaplano ang national government nga buhinan ang foreign borrowings sa 10 percent sa medium term nga amo ang magahimo sang domestic borrowings sa 90 percent.
Ini nga proposal suno kay Recto ang naga-target sang gradual shift sa 90 percent domestic borrowing agud nga mabuhinan ang mga risgo kaangot sa foreign exchange sa paglapaw sang 2028.
Sang nagligad nga tuig, naka-secure ang DOF sang 12 financing deals kag nakahulam sang kabug-usan nga $5.67 billion (P333.42 billion) agud mapondohan ang mga proyekto sa infrastructure, transport, defense, digital technology, health, kag agriculture.
