Ginbasura sang Premier Volleyball League (PVL) ang protesta nga gin-file sang team nga PLDT High Speed Hitters batok sa crucial non-call sang referee sa semifinals match batok sa Akari Chargers.
Natabo ang kontrobersiya sa ikalima nga set sang semifinals sa tunga sang PLDT kag Akari sang nagtawag sang net touch challenge ang High Speed Hitters apang gin-deny kag ginhatag ang point sa Akari.
Sang ulihi, ang Akari ang dalayon nga nagdaog kag magasabak sa finals apang gin-ulan naman ini sang pagpakamalaot halin sa volleyball fans.
Ginsiling sang High Speed Hitters nga isa ini ka malain nga ekspersyensya para sa team apang bugal nila nga magbato para sa integridad indi lang sang ila nga team kundi para sa volleyball community sa Pilipinas.
“We sadly share the news that the Premier Volleyball League has decided to junk our protest regarding their referees’ decision to not call a net touch on a crucial juncture of our match versus Akari in the semifinals,” pahayag sang team.
Nagpasalamat man ang team sa ila fans sa paghatag sang bug-os nga suporta.
Matandaan nga ginplastar sang liga ang FIVM rules kun sa diin nakasaad nga ang player mahimo makatandog sa net sa kondisyon nga indi makatublag sa play.
Bangud pinal na ang desisyon, magapadayon ang liga sa katapusan nga hampang subong nga adlaw kun sa diin magahampang ang PLDT kag ang sister team nga Cignal sa bronze medal match, samtang magasambuwa naman sa championship ang Akari kag ang Creamline Cool Smashers para sa gold medal.
Una naman nga gin-anunsyo sang PLDT nga magaatras ini sa upcoming 2024 Invitational Conference apang bangud ini sa injuries sang ila star players.
