ILOILO – Nagalaum ang Philippine National Police (PNP) nga wala sang may matabo nga ‘major election related incidents’ sa May 13 midterm elections.
Sa exclusive interview sang Bombo Radyo kay Police Brigadier General John Bulalacao, Director sang Police Regional Office (PRO) 6, iya ginpahayag nga madamu sang ginakabig nga ‘risk factor’ nga mahimo nga makaapektu sa dalagan sang eleksyon sa Western Visayas ilabi na sa mga lugar nga may yara sang ‘intense political rivalry’.
Magluwas sa away-pulitika, ang presensya sang New Peoples Army (NPA) kag sang Private Armed Groups ang makabig man nga pamahog sa eleksyon.
Ginhalimbawa ni Bulalacao ang 5th District sa probinsya sang Iloilo kag ang banwa sang Moises Padilla sa Negros Occidental nga mga lugar nga may yara sang ‘intense political rivalry’.
Ini ang rason kun nga-a ginpaidalom sa Commission on Elections (COMELEC) control ang Moises Padilla samtang ginpadugangan naman ang ‘police deployment’ sa 5th District sa probinsya sang Iloilo.
Malaw-ay lang panumdumon suno kay Bulalacao nga ang mga local officials mismo ang nagahimu sang kabulastugan paagi sa paghupot sang indi lisensyado nga armas kasubong sa nadakpan nga Punong Barangay sang Abangay, Dingle, Iloilo.
