Nagmandu si President Ferdinand Marcos Jr. sa Philippine National Police (PNP) nga maid-id nga imbestigaran ang pagpatay sa radio broadcaster sa Calamba sa Misamis Occidental nga si Juan Jumalon.
Pahayag ni Marcos, wala sang lugar sa Pilipinas ang amo sini nga sahi sang pagpang-atake sa mga katapo sang media gani ginapasalig sang iya administrasyon nga mahatagan sang hustisya ang kamatayon sini.
“Mahigpit na kinokondena ng ating Pangulong Ferdinand R. Marcos Jr. ang pagpatay sa broadcaster na si Juan Jumalon. Ang ganitong walang kabihasnang pag-atake sa ating mamamahayag ay walang lugar sa isang demokratikong bansa,” kabahin sang pahayag sang Presidential Communications Office (PCO).
Si Jumalon, 57, kilala nga si DJ Johnny Walker sang Gold FM 94.7 Calamba, ang ginpatay sang wala pa natumod nga suspek. Ginluthang ini samtang nga naka-on air kag nakita mismo ang krimen sa Facebook livestream sang iya nga show.
Natabo ang krimen pasado ‘las singko sang kaagahon sang Domingo, Nobyembre 5, sa iya kaugalingon nga radio station nga nahamtang sa ila balay.
May yara man sang gintukod nga special investigation task group agud nga matutukan ang amo nga pagpang-atake.
Suno naman sa Presidential Task Force on Media Security, naghingyo na ini sang bulig halin sa National Bureau of Investigation (NBI) para makatipon sang ebidensya.
Nagpasalig man ang Department of Justice (DOJ) sang maid-id nga imbestigasyon, madasig nga pagdakop sa suspek/mga suspek kag pagpasaka sang kaso sa kutob sang may salabton. #
