Indi sigurado ang Vatican kun san-o mahimo makaguwa sa ospital si Pope Francis.
Suno kay Matteo Bruni, director sang Holy See Press office, magapadayon ang pagbulong sa 88-anyos nga Santo Papa sa ospital sa Roma tubtub nga kinahanglan.
May yara ini sang respiratory tract infection, apang suno kay Bruni, nakatulog ini sang maayo kag wala nagtaas ang hilanat sa una nga gab-i sang pagpabulong.
Antes ang medical treatment, isa ka semana na nga nagasuprer si Pope sang bronchitis kag nagapalihog na lang sa iya mga aide sa pagbasa sa iya nga speeches kag addresses bangud nabudlayan maghambal kag magginhawa.
Biyernes sang aga oras sa Roma sang gindala ini sa Gemelli Hospital nga amo ang pinakadaku nga pasilidad sa amo nga pungsod.
May espesyal ini nga pasilidad para sa mga Santo Papa. Diri man anay nagtinir si Pope Francis sang Hunyo 2023 sang nagpaidalom ini sa surgery para ma-repair ang abdominal hernia.
Sa guwa sang ospital sang weekend, madamo nga tumuluo nga Katoliko ang nagtipon sa atubang sang statue ni John Paul II para nga magpangamuyo para sa ikaayong lawas sang Argentine pontiff.
Makatulublag nga isyu ang bronchitis para sa Santo Papa bangud nagsuprer na ini nga daan sang lung-related issues bisan pa sa bata nga edad.
2013 sang nangin Santo Papa si Pope Francis nga amo ang labing-una halin sa South America.
Sa edad nga 88, naga-baston na ini kag nagagamit sang wheelchair. Sang nagligad nga bulan, natumba ini kag nakaangkon sang injury sa butkon.
Nagsuprer man anay si Pope sang diverticulitis, isa ka common condition nga makatuga sang inflammation ukon infection sa colon. Sang 2021, may surgery man siya agud makakas ang parte sang iya colon.
