Nagsabat si President Ferdinand “Bong-bong” Marcos, Jr. sa death threats nga ginpangbuy-an ni Vice President Sara Duterte batok sa iya, kay First Lady Liza Araneta-Marcos, kag kay House Speaker Martin Romualdez.
Suno kay President Marcos, bilang isa ka democratic country, obligasyon niya nga ipabilin nga nagadalagan ang “Rule of Law” sa Pilipinas sa piyak sang pagpakamalaut nga iya nabaton halin kay Duterte.
Para kay Marcos, indi na kontani maglab-ot pa sa amo nga drama kon ginsabat sang bise-presidente ang mga issue sang Office of the Vice President (OVP) kag sang Department of Education (DEPED) sa Kamara kag Senado sa idalum sang iya nga pagpamuno.
Ginhatagan man sang natungdan sang impasiya nga ang kamatuoran ang indi na dapat pa nga “i-tokhang”.
Gin-athag man sang presidente nga ginarespeto sini ang tanan nga sangay sang gobyerno, apang ginakabig sini nga makatulublag ang mga tinaga nga ginbuy-an ni VP Sara Duterte.
Wala naman ginsambit ni Marcos ang pangalan ni Duterte apang maathag nga siya ang ginatumod sini sa iya pahayag.
Nahibaluan nga ang makahalalit nga tinaga ni Duterte sang nagligad nga semana nagluntad sa tunga sang imbestigasyon sang House panel sa ginaalegar kwestyonable nga budget sang Office of the Vice President kag Department of Education sang ini ang yara sa idalom sang iya liderato.
Magka-tandem si Marcos Jr. kag Duterte sang nagligad nga 2022 elections.
