𝗪𝗣𝗦 — Ginkondenar ni President Ferdinand “Bongbong” Marcos Jr. ang mga delikado nga akto sang air force sang China sa Scarborough Shoal ukon Bajo de Masinloc, nga nagbutang sa katalagman sang kabuhi sang mga katapo sang Philippine Air Force (PAF).
Gintawag sang Presidential Communications Office (PCO) ang mga akto sang People’s Liberation Army – Air Force (PLAAF) sang nagligad nga Huwebes, Agosto 8, bilang indi makatarunganon, ilegal kag wala sang hinalung-ong.
Suno sa Presidential Communications Office, hugot nga ginapakamalaut sang Presidente ang natabo nga air incident sa Bajo de Masinloc sang kag nagapanindugan sa maisog nga Armed Forces of the Philippines, ilabi na ang Philippine Air Force.
Ginpahayag man sang Presidential Communications Office, nga ang mga aksyon sang eroplano sang People’s Liberation Army – Air Force (PLAAF) ang indi makatarunganon, ilegal kag reckless, ilabi na nga ang eroplano sang Philippine Air Force nagahimo sang isa ka kinaandan nga operasyon sa seguridad sa kadagatan sang Philippine sovereign airspace.
Suno naman sa Armed Forces of the Philippines (AFP), duha ka eroplano sang People’s Liberation Army – Air Force ang naghimo sang makatalagam nga mga maniobra kag naghulog sang mga flare sa alagyan sang isa ka NC-212i PAF propeller aircraft nga nagapatigayon sang routine maritime patrol sa ibabaw sang Scarborough Shoal mga alas 9 sang aga sang Huwebes.
Ginsiling man sang Armed Forces of the Philippines nga ang eroplano sang China nagpasilabot sa legal nga operasyon sang paglupad kag naglapas sa internasyonal nga kasuguan sa aviation safety.
Dugang pa sang AFP nga magapadayon sila sang ila mga operasyon sa pagpatrolya kag pagbantay sa Scarborough Shoal, kasunod sang delikado kag makahalalit nga insidente.
Ginpahayag man sang AFP nga na-report na nila ang insidente sa Department of Foreign Affairs (DFA) kag sa mga natungdan nga ahensya sang gobyerno.
Nahibaluan nga ang Scarborough Shoal, isa ka trianggulo nga pormasyon sang coral reef nga nagapalibot sa isa ka lagoon, bantog sa iya manggaranon nga tubig kag mga manggad sa dagat. Nahamtang ini sa 124 nautical miles gikan sa Masinloc, Zambales, kag ginakabig nga yara sa sulod sang 200-nautical mile exclusive economic zone sang Pilipinas, base sa 1982 UNCLOS.
Sang 2016, ang Permanent Court of Arbitration (PCA) nga nakabase sa Hague nagkabig sang Scarborough Shoal nga isa ka high-tide feature, nga nagakahulugan nga ang pila sang mga bato sini nagpabilin nga exposed sa mataas nga tubig.
Apisar sini, natukiban sang tribunal nga ang mga high-tide features sa shoal ukon “mga bato nga indi maka-sustain sang human habitation kag kaugalingon nila nga puluy-an” kag wala sang exclusive economic zone ukon continental shelf.
Samtang ang China, nga wala nagakilala sang paghukom, nagaangkon man sang soberanya sa Scarborough Shoal, nga ginatawag sini nga “Huangyan Dao” kag ginakabig ini nga kabahin sang Zhongsha Islands.
