Aprobado ni President Ferdinand ”Bongbong” Marcos Jr., ang plano sang mga mamalidha nga tan-awon ukon usisaon ang mga flood control projects kasunod sang daku nga pagbaha nga dala sang Severe Tropical Storm Kristine.
Sa isa ka ambush interview sa Laurel, Batangas, gintumod ni Marcos nga ”overwhelmed” ukon nalumos man ang mga flood control projects sang pungsod bangud sang mabaskog nga ulan ni Kristine.
Una na nga ginbuyagyag ni Senate President Francis “Chiz” Escudero nga pamangkuton sang mga senador ang mga concerned agencies sa ila budget allocation para sa flood control projects bangud pila ka mga lugar ang nalumos sa tubig bangud kay Kristine.
Ginalauman ni Escudero nga madala ini sa tion sang budget deliberations sang Department of Public Works and Highways (DPWH), Department of Environment and Natural Resources (DENR), Department of the Interior and Local Government (DILG), DSWD, kag sang Office of Civil Defense.
Kon balikan sang Agosto, ang Department of Public Works and Highways (DPWH) nag-ako sa Senate hearing nga kulang ang national flood control masterplan sa pungsod.
Gin-ako man ni DPWH Secretary Manuel Bonoan sa tion sang interpellation ni Senador Imee Marcos kag matapos niya ginreport nga ang 5,521 ka natapos nga flood control projects ang “immediate relief projects for flood mitigation” sa tion sang Senate public works inquiry sa pagbaha sa pila ka bahin sang pungsod nga gindala sang mga nagligad nga tropical cyclones.
Ginpahayag man ni Bonoan nga pila ka mga masterplans sa 18 ka mayor nga river basin ang already existing sang nagbulos ang administrasyon ni Marcos.
Dugang niya, gina-update na sila subong agud makonsiderar ang climate change phenomenon kag iban pa nga mga bagay.
