Ginpangunahan ni President Ferdinand “Bongbong” Marcos Jr. ang pagpanagtag sang masobra P80 million nga financial assistance sa mga munisipyo sa Cagayan nga naapektuhan sang bagyo Marce.
Naghatag ang national government sang P10 million nga balor sang cash assistance sa mga munisipalidad sang Aparri, Buguey, Sanchez-Mira, Santa Teresita, Baggao, Gattaran, Gonzaga, kag Santa Ana.
Ginpahayag ni Marcos nga ang Department of Social Welfare and Development (DSWD), Department of Labor and Employment (DOLE), kag Department of Agriculture (DA) magapadayon sa paghatag sang bulig sa mga pumuluyo nga nagakinahanglan, subong man sa mga palangabuhian nga naapektuhan sang tropical storm.
Gindugang sini nga ang Department of Public Works and Highways (DPWH) kag Department of Education (DepEd) ang magadumala man sa pagkay-o sang mga imprastraktura kag mga eskwelahan nga nahalitan sang bagyo.
Nahibaluan nga 1,800 ka food packs ang ginpanagtag sang DSWD; 200 packs sang 5 ka kilo nga bugas kag 20 box sang sardinas sang Bureau of Fisheries and Aquatic Resources (BFAR); kag 1,000 packs sang 10 ka kilo nga bugas sang National Irrigation Administration (NIA).
Ang DA nagtanyag man sang masobra P866.3 million sa nagkalain-lain nga intervention sa mga mangunguma nga ginabug-usan sang hybrid nga seeds sang humay, diskwento sa abono, seeds sang utanon, native nga manok, kag pato.
Nahibaluan nga isa ang ginapahayag napatay bangud sa epekto sang Marce suno sa National Disaster Risk Reduction and Management Council.
