Nag-upod si President Ferdinand Marcos Jr. sa mga world leaders sa Jakarta samtang nagatambong sa inagurasyon sang bag-o nga Presidente sang Indonesia nga si Prabowo Subianto.
Si Marcos Jr. kag iban pa nga mga lederes sang mga estado nagpadulong sa People’s Consultative Assembly sa Jakarta, sa diin ginsugata sila sang 73-anyos nga si Prabowo, isa ka anay heneral nga nagdaug sa eleksyon via landslide.
Lakip sa mga world leaders nga nagtambong sa inagurasyon sanday Brunei Sultan Hassanal Bolkiah kag Singaporean Prime Minister Lawrence Wong.
Si Prabowo ang anay gin-akusahan nga mastermind sang pag-abduct kag pagpatay sa masobra 20 ka mga democracy activist sang ulihi nga bahin sang dekada 90, antes natapos ang pagpanuno sang diktador sang Indonesia nga si Suharto.
Bangud sini, si Prabowo ginpaguwa sa militar bangud sa mga pag-abduct, apang wala gid siya ginpasakaan sang kaso sa korte.
Sa pag-abot sang eleksyon, gin-rebrand ni Prabowo ang iya imahe sa isa ka “cuddly grandpa” nga naga-post sang mga dancing video, kag gin-recruit si Gibran Rakabuming Raka, anak sang sadto-President Joko Widodo.
Sang Septyembre, si Prabowo naglupad pakadto sa Manila antes sang iya inagurasyon kag nagkomiter nga pabakuron ang kaangtanan sang Manila kag Jakarta sa idalom sang iya administrasyon.
Nahibaluan nga ang Pilipinas kag Indonesia magasaulog sang ika-75 nga anibersaryo sang ila relasyon sa bulan sang Nobyembre.
