ILOILO CITY – Ipatawag ni Iloilo City Mayor Jerry Treñas ang Presidente sang MORE Electric and Power Corporation nga si Mr. Roel Castro may kaangtanan sa sunod-sunod nga brownout sa syudad sang Iloilo.
Sa interview sang Bombo Radyo kay Treñas, iya ginpahayag nga siya mismo ang nakasaksi kag naapektuhan sang tuman ka lawig nga brownout.
Suno kay Treñas, dapat nga ipaathag ni Castro kun ano gid ang rason sang masami kag tuman ka lawig nga power interruption.
Ipatawag man niya suno sa alkalde si Engr. Randy Pastolero, Executive Assistant for Power sang Iloilo City Government, agud nga maplastar ang mga nagakadapat nga himuon.
Nahibalu-an nga una na nga ginpahayag ni Jonathan Cabrera, tagpamaba sang MORE Power, nga wala nila ginadula ang posibilidad nga may pagpangsabotahe nga nagakatabo agud gub-on ang imahe sang bag-o nga power distributor.
