Nagsaka sang masobra piso ang presyo sang mga produktong petrolyo epektibo subong nga aga, Marso 3.
Gasolina: 1.90 kada litro
Diesel: 1.20 kada litro
Kerosene: 1.50 kada litro
Ini na ang pang-walo nga sunod-sunod nga semana nga may saka-presyo sa gasolina, kag pang-10 naman nga sunod-sunod nga semana para sa diesel kag kerosene.
Una na nga gin-project sang Department of Energy-Oil Industry Management Bureau (DOE-OIMB) ang masobra piso nga saka sa presyo subong nga semana ilabi na bangud sa nag-ibwal nga tensyon sa tunga sang US kag Israel batok sa Iran nga subong naglapta na sa Middle East.
Nagpanawagan naman si Senator Bam Aquino nga dapat i-suspend na sang gobyerno ang excise taxes sa fuel sa idalom sang Tax Reform for Acceleration and Inclusion (TRAIN) Law.
Suno kay Aquino, sa idalom sang TRAIN Law, may yara sang automatic suspension of excise taxes sa petroleum products kun ang average global oil price nagalab-ot na sa $80 per barrel para sa tatlo ka sunod-sunod nga bulan.
Makabulig ang suspension suno sa senador agud nga mabuhinan ang bug-at nga pas-anon sang mga pumuluyo sa pagsaka sa presyo sang langis samtang mataas ang tension sa Middle East.
Kun magsaka ang presyo sang gatong suno sa senador, ginaantisipar nga magasunod man sa pagsaka ang iban nga balaklon pati na ang pagkaon.
Sabado sang gin-umpisahan sang US kag Israel ang operasyon sa Iran nga nagpatay sa ila Supreme Leader kag iban pa nga senior officials. Nagbalos ang Tehran kag ginpang-atake ang military bases sang Estados Unidos sang Middle East.#
