Wala pa sang na-monitor nga pagtaas sa presyo sang iban pa nga produkto magluwas lang sa mga produktong petrolyo ang Department of Trade and Industry (DTI) Iloilo.
Sa interview sang Bombo Radyo kay Judith Degala, provincial director sang DTI Iloilo, iya ginpahayag nga ang pinakaulihi nga gin-issue nga suggested retail price (SRP) amu ang sang Enero 27.
Suno kay Degala, sang ginpagwa ang SRP sang Enero, yara pa sa idalom sang state of calamity ang Iloilo Province; amu nga wala sang paghulag sa presyo sang mga basic kag prime commodities.
Dugang pa niya, ang presyo sang produkto ang nakadepende sa SRP.
Wala ginapahanugutan ang mga manufacturers nga magpasaka sang presyo sang ila produkto kun ini ang wala pa naaprubahan sang DTI.
Apang, suno sa natungdan posible nga indi gid malikawan ang pagsaka sa presyo sang mga balaklon kun indi mag-untat ang asud-asud nga pagtaas sa presyo sang gatong.
Nahibaluan nga nakabase sa proposal sang mga manufacturers ang pagsaka sa SRP sang mga balaklon.
Kun maaprubahan na sang DTI ang ila nga proposal, magahulat pa sang 30 ka adlaw kag ini ang maimplementar sa merkado.
Nagpaathag naman si Degala nga ‘minimum’ increase lang ang ginahatag sang mga manufactures agud nga indi man matam an sang tuman kamahal nga presyo sang balaklon ang mga tawo.
