Ginkumpirma sang Buckingham Palace nga na-ospital ang manghod ni King Charles nga si Princess Anne bangud sa gin-suprer sini nga samad sa ulo.
Ang 73-anyos nga prinsesa — naga-isahanon nga anak nga babaye sang anay reyna sang Britanya nga si Queen Elizabeth II — ang nakaangkon sang minor injuries kag concussion kasunod sang insidente nga ginapatihan naga-involve sang kabayo.
Suno sa palasyo, nagapahuway-huway ini subong kag naga-recover samtang yara sa Southmead Hospital sa Bristol sa west England.
“Her Royal Highness is recovering well, is in a comfortable condition and is being kept in hospital as a precautionary measure for further observation,” suno sa spokesperson sang Buckingham.
Sandig sa royal source, natabo ang insidente kay Princess Anne samtang nagalakat-lakat ini sa Gatcombe Park estate kun sa diin nahamtang ang iya puluy-an. Ginapahayag nga may mga kabayo sa amo nga area, kag suno sa iya nga medical team, ang head injuries sang prinsesa ang nagasanto sa impact sang ulo ukon tiil sang sapat.
Nag-upod sa ospital ang iya bana nga si Tim Laurence kag iya duha ka mga kabataan nga sanday Zara Tindall kag Peter Phillips nga yara man sa estate sang natabo ang insidente.
“The king has been kept closely informed and joins the whole royal family in sending his fondest love and well-wishes to the princess for a speedy recovery,” dugang pa sang palasyo.
Natalana nga magapauli ang prinsea subong nga semana apang ginkansela anay ang mga aktibidad sini lakip na ang pagpadulong kuntani sa Canada sa weekend.#
REUTERS/ Hannah McKay/ Pool/ File photo
