PRO6, nakakumpiskar sang masobra P60M nga balor sang Droga sa una nga bulan sang 2026

Nakakumpiskar ang Police Regional Office 6 (PRO6) sang masobra P60M nga balor sang iligal nga druga sa una nga bulan sang tuig 2026.

Ini matapos ang ginpatigayon nga 109 ka anti-drug operations kun sa diin 137 ka mga indibidwal ang na-aresto nga ginalakipan sang 56 ka mga high-value individual (HVIs) kag 81 naman nga street-level suspects.

Nahibaluan nga ang pinakadamo nga confiscation amo ang naga balor P8.7M nga narekord sa Batad, Iloilo.

Isa man ka dako nga operasyon amo ang pag-aresto sa incumbent Barangay Chairman sang San Dionisio kun sa diin narekober sa opisyal ang malapit P6.5M nga illegal drugs.

Bangud diri, ginpahayag ni PRO 6 Director Police Brigadier General Josefino Ligan nga padayunon nila nga pagatutukan ang supply and reduction program sa Western Visayas bilang isa sa mga pamaagi agud matapna ang illegal nga droga.

Suno pa kay Ligan, ginaplanohan man ang pagpahamtang sang nga operation center sa mga transit areas para malikawan ang pagsulod sang druga sa rehiyon.

May yara naman sang ginlunsyar nga narcotics detection dog course nga may ara sang 22 ka mga K9 dogs kag handlers nga ginpaidalom sa training agud nga makabulig man nga mas mapasangkad ang operasyon kontra sa illegal nga mga droga.

Dugang pa niya nga pagatutukan man ang law enforcement operations kun sa diin igapaidalom sa mandatory drug test ang mga kapulisan agud masiguro nga wala sa ila ang may naga-gamit sang iligal nga droga.

Madumduman nga ginpaidalom sa drug test ang 110 ka mga hepe sa rehiyon sang Pebrero 3 kun sa diin naguwa ang resulta subong kag nakit-an nga negatibo ang mga ini.