Nagpatigayun sang hublag protesta sa atubang sang Iloilo City Hall ang pila ka mga progresibo nga grupo, lakip na ang pila ka mga bolantero sa Iloilo Terminal Market kag Iloilo Central Market.
Sa interview sang Bombo Radyo kay Jossel Gabuan, isa ka bulantera sa Iloilo Terminal Market, iya ginpahayag nga nagpromisa si Iloilo City Mayor Raisa Trenas sa ila nga pagahatagan sang nagakaigo nga pwesto ang tanan nga mga vendors nga wala makasulod sa Terminal Market, apang asta subong nagahulat sa gihapon sila sa katumanan sang amo nga promisa.
Suno pa sa iya nga nahulogan ini sang iya ginabusong sang tion nga nagpatigayun ang mga personnel sang city hall sa amo nga merkado sang clearing operation kag tuman gid ini kasakit sa iya bilang isa ka iloy, apang wala ini sang mahimo.
Gi-alegar man sini nga indi mayo ang pagtratar sa ila ni Local Economic Enterprise Office (LEEO) head Maricel Mabaquiao kag gina-harass sila sang mga personnel sang amo nga opisina.
Sa karun, nagapanawagan ang mga ini kay Mayor Trenas nga mabalik ang tanan nga mga vendors sa merkado kag mapahanugotan ang mga bolantero nga makabaligya sa palibot sang merkado sa natalana nga oras, lakip na ang pag-isyu sang “goodwill” kag iban pa nga mga balayran sa merkado.
Sa separado naman nga interview sang Bombo Radyo kay Public Order and Safety Management Office (POSMO) head Ret. Pcol. Uldarico Garbanzos, iya man ginpaathag nga iya gid nahangpan ang mga panawagan sang bulantero apang ginadumilian na sa karun ang pagbaligya sa bisan diin lamang nga bahin sang dalanun sang siyudad, bangud posible ini magtuga sang huol sa dalagan sang trapiko.
Ginklaro man sini nga apisar may yara sila sang joint operation sa Iloilo Terminal kag Central Market, wala “nagapang-confiscate kag nagapang-harass” ang iya mga personnel.
