Posible nga magsulod sa consignment basis ang Guimaras Provincial Government sa pagbakal sang bugas sa Food Terminal Incorporated agud ibaligya sa mga Guimarasnon sa P20 kada kilo.
Ini ang tikang sang probinsya kasunod sang pagpili sa Visayas bilang pilot region sa pagbaligya sang bugas sa mas manubo nga presyo bangud madamo sang stocks ang warehouses sang National Food Authority kag handa man nga magkooperar ang mga local officials.
Sa interview sang Bombo Radyo kay Guimaras Governor JC Rahman Nava, iya ginpahayag nga sang damlag lang ginhatagan siya sang otoridad sang Sangguniang Panlalawigan nga mahimo ini makanegosyar sa Food Terminal Incorporated pinaagi sa consignment basis.
Suno kay Nava, kun P26.50/kilo ang presyo sang bugas, mahimo i-subsidize sang Provincial Government ang P6.50 agud mabaligya ini sa P20/kilo.
Pinaagi sini, pahayag niya, mapaguwa sang Natonal Food Authority pinaagi sa Food Terminal Inc. ang mga available nga stocks kag makaumpisa liwat nga makabakal sang bugas sa mga mangunguma.
Nagalaum si Governor Nava nga mapadayon sa palaabuton ang pagbaligya sang bugas sa manubo nga presyo.
Ginalantaw pa sang natungdan kun ano ang logistical requirement sa pag-transport sang bugas pakadto sa Guimaras.
Sa mga nagaduha-duha sa kalidad sang P20/kilo nga bugas pahayag sang gobernador, ginpasalig sini nga local ang ini nga bugas kag halin ini mismo sa mga local man nga mangunguma.
Nagapati si Governor Nava nga hatagan sang mayo nga presyo ang mga mangunguma agud mahatagan sang mayo man nga presyo ang mga konsumidor.
