ILOILO CITY – Nagakahangawa ang public health specialist sa nagakatabo nga pag ‘Covidized’ sa sosyudad tuga sang COVID-19 pandemic.
Sa interview sang Bombo Radyo kay Dr. Philip Ian Padilla, chairman sang Division of Biological Sciences sang College of Arts and Sciences sa University of the Philippines – Visayas, iya ginpahayag nga humalin sang naglupok ang COVID-19 pandemic, daw kaangay nga ini na lang ang mayor nga ginatutukan sang gobyerno kag nakalipatan na ang iban pa nga mga balatian.
Suno kay Padilla, humalin sang may pandemya, daw kaangay nga tanan nga mga budget sang gobyerno ang ginabubo na lang sa COVID-19.
Magluwas sini, madamo man sang mga naapektuhan halimbawa na lang ang pagbata sa diin ginadumilian na ang mga ini sa pagdala sa mga ospital ukon sa iban nga quarantine facility.
Ginpaathag ni Padilla nga sa kaso sang mga nagabusong, kinahanglan sang mga ini ang tatapon sang maayo agud matutukan ang maternal health kag malikawan ang mortality ukon pagkapatay sang iloy ukon sang iya lapsag.
Samtang nagpanawagan man ang natungdan sa ospital ilabi na ang mga private nga dugangan ang bed capacity sa mga COVID-19 patients.
Nagakadapat man suno sa natungdan nga mag-ugyon ang mga local government ukon kag national agency agud indi lang ang COVID-19 ang matapna kundi ang iban pa nga mga balatian.
