ILOILO – Yara na sa mayo nga kahimtangan ang pulis nga natiruhan sa ginpatigayon nga buy bust operation sang Provincial Drug Enforcement Unit (PDEU) sa Sitio Tuburan, Barangay Trapiche, Oton, Iloilo.
Ang pulis amo si Police Corporal Gilbert Lingaya nga nagaserbe nga backup, residente sang Barangay Damires, New Lucena, Iloilo.
Samtang ang main subject naman sa buybust amo si Mike Cantera, singkwentahon ang edad, kag tumandok sang amo nga barangay.
Sa interview sang Bombo Radyo kay Police Lieutenant Colonel Arnel Solis, spokesperson ng Police Regional Office 6, iya ginpahayag nga naoperahan na ang pulis matapos ginluthang sang pakaisa sang subject sang operasyon.
Suno kay Solis, nag-angkon sang pilas sa nawala nga bukton ang biktima kag gilayon man nga gindala sa ospital.
Sang nadakpan na ang suspek, nanotisyaran sang operatiba nga may tawo pa sa sulod sang balay, kag sang gintulod ang puertahan, nagpalupok na ang gunman nga ginapatihan nga himata man ni Cantera.
Naigu ang pulis sa butkon, kag nagsinggit ini nga mag-withdraw bangud may pusil kag granada ang gunman nga nakasanto man sa ila nga impormasyon halin sa confidential asset.
Ginsapar sang mga pulis ang seguridad sang ila kaupod kag ginhingalitan naman ini sang subject kag kaupod sini nga makapalagyo matapos ang tatlo ka oras nga negosasyon nga magsungka.
Nakuha naman sa ginluntaran sang insidente ang tatlo ka grams sang suspected shabu nga nagabalor sang P12,000 kag isa ka basiyo sang 12 gauge homemade shotgun.
