Sa kustodiya na sang Cabatuan Municipal Police Station ang 60-anyos nga punong barangay sang Barangay Duyan-Duyan, Cabatuan, Iloilo.
Ini matapos ang ginapahayag nga pagpaniro sini sa apat ka persona nga nagasakay sa duha ka motorsiklo kagab-i, Agusto 16.
Ginkilala ang suspek nga si Alfredo Jomilla Cabar Jr., punong barangay sang nasambit nga lugar.
Sa interview sang Bombo Radyo kay Pcapt. Mary Dhen Gerbolinga, Officer-in-charge sang Cabatuan Municipal Police Station, iya ginpahayag nga matapos madakpan ang suspek, ginahulat na lamang ang mga biktima para sa pag-file sang kaso.
Base sa imbestigasyon sang kapulisan, ginpara anay ni Cabar ang motorsiklo nga ginamaneho ni Hermie Jun Galindo Paniagua, 21 anyos, nga may angkas nga si RM Tumolto Saguan, 23 anyos.
Nakita sang duha nga nagakuha sang armas si Cabar halin sa iya sling bag, gani nagpalagyo sila.
Ginpalukpan sila sang suspek sang duha ka beses, apang wala sila maigo.
Samtang, ginpara man sang suspek ang isa pa ka motorsiklo nga ginamaneho ni Francisco Sabino Choresca, 21 anyos, upod ang iya angkas nga si Juliet Antonio Mota, 18 anyos.
Pareho man nga nakita sang duha nga nagakuha sang armas si Cabar, gani nagpalagyo sila kag ginapahayag nga nagpalupok man ini sang duha ka beses .
Wala man sa apat ka biktima ang naigo sang bala.
Duha ka basyo sang caliber .45 nga bala ang narecover sang kapulisan sa crime scene.
Suno kay PCapt. Gerbolinga, indi na kuno madumduman ni Cabar ang iya ginhimo bangud nakainom ini sang makahulubog nga ilimnon.
Natalana nga pasakaan si Cabar sang kaso nga multiple attempted homicide kag illegal possession of firearms.
