ILOILO CITY- Madayon sa gihapon ang PUV modernization program sang gobyerno.
Ini ang gin-athag sang Department of Transportation kasunod sang naglapta nga isyu nga ipaiway ini kasunod sang deliberasyon sang Senado sa P147 billion budget proposal sang ahensya.
Sa interview sang Bombo Radyo kay Department Of Transportation Undersecretary Mark De Leon, iya ginpahayag nga ang pagpatuman sang Public Utility Vehicle Modernization Program (PUVMP) ang magapadayon apisar tugutan ang mga traditional jeepneys nga makabyahe apisar maglapaw na sa 2020.
Suno kay Undersecretary De Leon, apisar may mga operators nga indi pa maka-modernized sang ila units sa 2020, sila ang hatagan sang konsiderasyon agud indi insigida nga phase -out sa kondisyon nga sila ang nakapasar sa Motor Vehicle Inspection System (MVIS) ukon roadworthiness test.
Ginpahayag ni De Leon, kun ang isa ka unit nakapasar sa nasambit nga test,ini ang hatagan sang provisional authority (PA) nga mangin valid sa isa ka tuig kag i- required nga ipaidalom liwat sa technology-based Motor Vehicle Inspection System (MVIS) agud maka-renew.
Apang suno sa iya, ang mga PUV operators ang i- require gihapon nga mag-file sang petisyon para sa consolidation kag magpabutyag sang intensyon nga i- modernize ang ila unit agud indi ma-kansela ang ila provisional authority apisar ila napasaran ang roadworthiness test.
Gindugang sang opisyal nga sa tion nga mapaslawan ang operators nga mag-file sang ila consolidation sa Hunyo 30, 2020, ang ila ruta ang pagabuksan sa tanan nga interesado nga aplikante ukon bag- o nga operators.
Ginpat-ud naman ni De Leon nga may ihatag nga financial kag technical assistance ang gobyerno agud mas mangin mamag-an sa bulsa sang mga operators ang pag-bakal sang modernized nga jeepney.
