ILOILO – Bastante ang mga quarantine facilities sa Western Visayas nga mahimo gamiton sa pag-abot sang Locally Stranded Individuals umpisa sa Hulyo 16.
Sa interview sang Bombo Radyo kay Atty. Roy Villa, tagpamaba sang Regional Inter-Agency Task Force, iya ginpahayag nga labi nga istriktuhan ang quarantine measures para sa Locally Stranded Individuals agud malikawan ang transmission sang Coronavirus Disease 2019 (COVID-19).
Ini ang kasunod sang mataas nga numero sang kaso sang COVID-19 sa mga LSIs nga gina-repatriate sa rehiyon kag ang pila sa ila ang ginapahayag nga ginapagwa na gilayon sa facility kun matapos ang 14 ka adlaw nga quarantine apisar wala pa nagguwa ang resulta sang confirmatory test.
Suno kay Villa, pag-abot sang Hulyo 16, kinahanglan gid nga hulaton ang Reverse Transcription Polymerase Chain Reaction (RT-PCR) test results antes pahanugutan nga makahalin sa facility quarantine.
Kun may yara sang maglapas, ipasaka gid ang nagakaigo nga kaso.
QUARANTINE CLASSIFICATION.
Sa bahin naman sang mga alegasyon nga hugton ang Coronavirus restrictions sa rehiyon pinaagi sa pagpatuman liwat sang General Community Quarantine, ginpahayag ni Villa nga kinahanglan nga hulaton ang desisyon sang National Inter-Agency Taskforce.
Suno kay Villa, ang national taskforce ang may pinal nga desisyon kag ini ang iga-base man sa rekomendasyon sang Regional Inter-Agency Taskforce kag sang mga local government units.
