BAROTAC NUEVO,ILOILO-Ginluthang-patay sang ginapahayag riding-in-tandem suspects ang isa ka quarry operator sa Zamora St., Poblacion,Barotac Nuevo, Iloilo.
Ang biktima ginkilala nga si Boy Almarsa,legal ang edad, residente sang Brgy.Lagubang sa nasambit nga banwa.
Sa interview sang Bombo Radyo Iloilo kay Punong Brgy Jose Marlou Lobaton sang Brgy. Cruz,Barotac Nuevo, iya ginpahayag nga gindul-ong sang biktima ang iya asawa nga maestra sa Jalaud Elementary School.
Suno sa punong barangay, nagapauli na ang biktima sakay sa iya motorsiklo sang ginsunda ini sang riding-in-tandem suspects kag gintiro sang nagaangkas nga lalaki.
Suno sa mga nakakita, nagasakay ang mga suspects sa pula nga Rouser nga motorsiklo nga wala sang plate number.
Ginapahayag nga naigo ang biktima sa likod kag naglapos sa dughan.
Gindala pa sa ospital ang biktima apang gindeklarar nga dead-on-arrival.
Suno naman sa testigo nga si Tatay Manuel, pumuluyo sang nasambit nga lugar, may nabatian siya nga isa ka lupok kag sang iya gintan-aw,natumba na sa dalan ang biktima.
Suno sa tigulang, wala sang suksok nga helmet ang mga suspects apang wala na niya matalupangdan ang itsura sang mga ini matapos madasig nga nagpalagyo.
