Masako na ang preparasyon sang Ilongga beauty queen nga si Rabiya Mateo sa pagbalik bilang full-time student matapos nga nabaton ini sa Doctor of Medicine program sa iya “dream school.”
Malipayon nga gin-anunsyo ni Rabiya nga nabaton na sini ang iya acceptance letter halin sa University of Santo Tomas Faculty of Medicine and Surgery sang Mayo 18.
Na-establisar ang UST Faculty of Medicine and Surgery sang 1871 kag ginakilala nga isa sa pinakadumaan kag pinaka-prestihiyoso nga medical schools sa Pilipinas nga naga-produce sang topnotchers sa Physician Licensure Examination kag nakahanas man sang prominent Filipino doctors, medical researchers, kag public servants sa sulod sang malawig nga dinekada.
Sa isa ka interview sa aktres, ginpahayag sini nga long-time dream niya nga mangin doktor ilabi na nga luyag sini gamiton ang iya kaalam agud nga mabuligan ang iban nga mga tawo.
Para sa iya, isa ka “calling” ang iya nga medical dream.
“It’s a calling and I’m so happy to share this to everybody that I’m gonna go back to med school,” pahayag ni Rabiya. “And I [have] wanted to become a doctor ever since.”
Matandaan nga walo ka tuig na ang nagligad, nag-gradwar si Rabiya bilang cum laude sa Iloilo Doctors’ College nga may degree sa physical therapy.
Ginkoronahan man siya nga Miss Iloilo tubtub nga nangin Miss Universe Philippines 2020, kag sang ulihi, nagsulod ini sa show business.
Sang Marso, liwat nga ginpabilib ni Rabiya ang netizens matapos nga nalab-ot sini ang 741 General Performance Score sa National Medical Admission Test. Sulod siya sa top 99th percentile sang tanan nga medical school applicants sa bilog nga Pilipinas.
Ginpakigbahin man sini nga bangud sa iya showbiz career, nakatipon siya sang funds para sa iya pagbalik sa higher education.
“After doing Miss Universe, after pursuing my career for quite some time, I was able to save up,” pahayag sini. “I’m very happy na I’m going back to studying, to learn a lot of things, to understand the human body, and to become a doctor.”
Sa latest social media update ni Rabiya, kaupod sini si Jake Cuenca nga nag-enjoy sa Disneyland getaway antes sini suguran ang iya journey sa medical school.#
