Ginpaathag ni Iloilo City Mayor Jerry Treñas kung ngaa indi pwede i-disclose ukon isa-publiko ang mga impormasyon sang mga nagpositibo sa Monkey pox (Mpox).
Sa interview sang Bombo Radyo kay Mayor Treñas, iya ginpahayag nga may mga pagsulundan nga ginhatag ang Department of Health (DOH) sa ila, gani ginakinahanglan ini nga sundon.
Suno man kay Dr. Mary Ann Diaz, head sang Iloilo City Health Office, ini man agud malikawan ang diskriminasyon nga matabo sa mga pasyente inkaso mabuyagyag ang ila mga pangalan.
Nagpasalig man si Treñas nga istrikto nga gina-monitor ang mga nagpositibo kag amo man ang tagsa ka mga barangay health workers sa siyudad.
Nakahanda man ang mga katapo sang City Social Welfare Development Office (CSWDO) agud maghatag sang assistance sa mga apektado sang Mpox.
Nahibaluan man nga 4 na ang kumpirmado kag may duha ka mga suspected nga kaso sang Mpox sa siyudad.
