ILOILO CITY – Mismo ang Miss Universe Philippines 2020 Rabiya Mateo ang nagpili sang iya mga gown sa pageant.
Sa exclusive interview sang Bombo Radyo kay Jun-G Bayona Candelario, designer ni Rabiya halin sa Lemery, Iloilo, iya ginpahayag nga ‘hands on’ ang Ilongga beauty sa pagpili sang iya gown.
Suno kay Candelario, madamo sila sang ginpreparar nga gown para kay Rabiya.
Sa pagkamatuod suno kay Candelario, ulihi na sila nakadesisyon kun ano ang color nga gamiton ni Rabiya sa preliminary kag coronation.
Nagpangayo naman sang pahanugot ang Ilongga beauty queen sa kay Jonas Gaffud nga co-founder sang beauty camp nga Aces and Queens antes sila naghimo sang pinal nga desisyon sa pagpili sang iya gown.
Ang puti nga gown nga ginsuksok ni Rabiya ang isa lang ka semana nga ginhimo sa diin may yara ini sang mga swarovski crystals.
“Si Rabiya is very hands on gid sa pagpili sang design kag color sang iya gown. Before siya naglakat sa Manila, nag fit kami sang red gown and siya mismo nag decide nga siling ya… RED IS MY WINNING GOWN,” pahayag ni Candelario.
Samtang ang pula nga gown naman nga gingamit sang beauty queen sa coronation ang isa ka bulan nga ginhimo kag ginbutangan man sang swarovski crystals.
Mismo si Rabiya suno sa designer ang naghambal nga masuksuk siya sang pula bilang winning gown.
