Ginbuyagyag ni Interior Secretary Jonvic Remulla nga yara sa Mindanao kag ginaprotektahan sang isa ka grupo si Senador Ronald “Bato” dela Rosa.
Suno sa tiglikom, nagapadayon ang negosasyon sang mga awtoridad sa grupo nga nagahatag sang proteksyon sa senador agud nga ma-turn-over ini sa mga otoridad kag malikawan ang posible nga madugo nga komprontasyon.
Dugang ni Remulla, indi basta-basta makasulod ang mga awtoridad sa lugar nga ginatineran ni Dela Rosa agud arestuhon ini bangud mahimo ini magresulta sa madamo nga casualties.
“He’s in Mindanao. He’s under the protection of a group we are currently initiating conversations with for his turnover to the authorities,” suno sa DILG chief.
Ginpahayag sang opisyal nga mas pilion niya ang makig-negosyar anay sa baylo nga ibutang sa peligro ang kabuhi sang mga Pilipino.
Wala niya ginpaathag kun diin naghalin ang iya estimate nga mahimo maglab-ot sa 10,000 ang mga posible nga mapatay kun matabo ang madugo nga kumprontasyon.
“In exchange for up to 10,000 potential deaths, I would rather negotiate first than cost the lives of Filipinos in this,” suno kay Remulla. “You don’t always solve problems with a hammer. Sometimes you solve things better in a more peaceful, humane way.”
Sang Septyembre, nagpaandam man si Remulla nga mahimo magresulta sa madugo nga insidente ang pagtinguha nga arestuhon ang senador.
May arrest warrant nga gin-isyu ang International Criminal Court ukon ICC batok kay Dela Rosa bilang indirect co-perpetrator sa crimes against humanity nga may kaangtanan sa mga pagpamatay kadungan sang kampanya kontra droga sang administrasyon ni anay Presidente Rodrigo Duterte.
Sang Mayo 11, gintinguhaan sang mga awtoridad nga iserbe ang arrest warrant batok sa senador. Nagresulta ini sa tensyon kag paglagsanay sa sulod sang building sang Senado.
Pagkatapos sini, ginbutang si Dela Rosa sa kustodiya sang Senado para sa iya proteksyon. Apang naghalin siya sa premises sang Mayo 14 kag wala na makita liwat sa publiko halin sadto.
Nagpahayag man si Remulla sang paghinulsol bangud wala gilayon nga naaresto si Dela Rosa sang una pa lang.
Suno sa tiglikom, ginpunggan siya sadto sang “gentleman’s agreement” ukon kasugtanan sa tunga sang Senado kag sang ehekutibo nga wala anay sang pag-aresto nga himuon samtang yara sa kustodiya sang Senado ang senador.
“The only thing that held me back was the gentleman’s agreement of the Senate and the Executive, that no arrest would be made as long as he was in their custody. So we were expecting that those holding custody over him were gentlemen,” pahayag pa sang tiglikom.#
