ILOILO – Nagapati si anay Department of Health Sec. kag subong Iloilo 1st District Representative Janette Garin nga bastante ang mga test kits sa Pilipinas.
Sa interview sang Bombo Radyo kay Rep. Garin, iya ginpahayag nga base sa iya nahibaluan, may yara sang gindonar ang China nga 100,000 ka mga test kits; naghatag man si Chinese business magnate Jack Ma sang 57,000 ka mga test kits; 50,000 ang gindonar sang Singapore kag may yara pa sang 20,000 ka mga test kits nga ginhatag sa Department of Health.
Suno kay Garin, indi siya magpati nga ginakulang ang test kits sa pungsod ilabi na sa Western Visayas bangud ang isa ka sansure test kit ang maka test sang 22 ka mga pasyente samtang ang isa ka test kit nga gindonar ni Jack Ma kag ang iya sang Singapore ang maka test sang 96 ka tawo.
Kun sumahon tanan pahayag nsang Congresswoman, ang tanan nga donasyon magluwas sa test kits sang University of the Philippines ang maka akomodar sang 12 million tubtob 14 million nga mga Filipino.
Nagapanawagan man si Garin sa Department of Health nga kuntani indi mag focus ang ahensya sa numero sang kits kundi sa numero sang tawo nga ginapaidalom sa test.
Gin-athag man sang Congresswoman nga ang rapid test kits amo ang naga determine sa IGG kag IGM nga mga antibodies sa lawas sang tawo.
Sa tion nga magpositibo sa IGG ang tawo, buot silingon may yara ini sadto sang Coronavirus Disease 2019 apang wala ini mabatyagan kag indi man ini makalaton sa iban bangud may yara sang pangontra ang lawas sang tawo,
Samtang kun magpositibo ang tawo sa IGG kag IGM buot silingon may yara sang proteksyon apang yara ang tawo sa 2nd week of infection.
Ang importante pahayag niya nga ipaidalom ang tawo sa polymerase chain reaction (RT-PCR) test kag kun mahibaloan nga nagpositibo ikaw sa nasambit nga test, kinahanglan man nga itest ang mga kaupdanan sang infected.
