ILOILO CITY- Ginaabi-abi ni Iloilo 2nd District Representative Mike Gorriceta ang rekomendasyon sang third party consultant may kaangtanan sa bag-o apang depektibo nga Ungka flyover.
Sa interview sang Bombo Radyo kay Iloilo 2nd District Representative Mike Gorriceta, iya ginpahayag nga apisar tuman ka dako ang P250 million nga initial nga budget nga kinahanglanon base sa pagbanta sang Abinales Associates Engineers Plus Consultants nga nagpatigayon sang geotechnical investigation sa Ungka flyover, apang kinahanglan ini agud nga masolusyunan na ang depekto sa amo nga proyekto.
Apang suno kay Gorriceta, kinahanglan sa gihapon nga may yara sang mga tawo nga manabat sa palpak nga Ungka flyver kag mahibaluan kun paano natabo ini agud malikawan nga masulit pa.
Matandaan nga kabahin sang rekomendasyon parasa rehabilitasyon sang proyekto amo ang pagkuha sang haligi sa piers 4, 5, kag 6 kag butangan sang dugang nga mga bored piles sa nasambit nga mga piers nga nakitaan sang pag-usmod; kag ang pagkakas sang mga girders nga nakatungtong sa amo man nga mga piers agud nga mahatagan sang ligwa ang pagbutang sang bored piles nga nagadalum sang 40 meters ang kada isa.
Ginapanan-aw naman nga sa masunod nga tuig pa masuguran ini bangud nga mangita pa sang pondo ang Department of Public Works and Highways kag magalawig sang 10 ka bulan ang pagkay-o sang flyover kun sa diin, posible nga sa katapusan nga bahin sang 2024 ukon sa Dinagyang Festival 2025 pa mahimo nga magamit ini sang publiko.
Ang kontraktor sang proyekto amo ang International Builders Corporation.
