𝗜𝗟𝗢𝗜𝗟𝗢 𝗖𝗜𝗧𝗬— Nagasinggitan sang hustisya ang pamilya sang anay punong barangay nga gintiro-patay sa Brgy. Baldoza, Lapaz, Iloilo City.
Ang biktima amo si Ernie Poral, 65-anyos, residente sang nasambit nga lugar, residente sang Brgy. Ingore, Lapaz, Iloilo City.
Sa interview sang Bombo Radyo kay Alyas Toto, anak sang biktima, iya ginpahayag nga aga pa sang naghalin ang iya nga amay kaupod man ang iya nga iloy agud nga magbakal sang bubod.
Suno kay Alyas Toto, nakabaton ini sang mensahe nga natirohan ang iya amay rason nga gilayon man ini nagpadulong sa lugar, kon sa diin, nasaksihan sini nga nagapanghilam-os na ang iya amay sang kaugalingon nga dugo.
Ginpahayag man sini nga sa iya pagkahibalo, wala sang kontra ang iya nga amay sugod sang nagpungko ini bilang punong barangay sang ila lugar.
Sa subong, may yara naman sila sang ginalantaw nga persona nga posible sa likod sang kamatayon sang iya amay.
Santo naman sa mga pahayag sang mga residente, alas-4:00 sang kaagahon subong nga adlaw, may motorsiklo nga nagakapakadto-pabalik sa tubang sang puluy-an sang anay punong barangay.
Ginalantaw man nga posible ginabantayan na nga daan ang anay punong barangay antes paman ini nga ginluthang-patay.
Nahibaluan nga nag-agum sang patal nga pilas sa ulo ang biktima nga nangin kabangdanan man sang iya kamatayon.
