‘Rest in Heaven’: Celebrities, naghatag sang tribute kay Vanessa Blanca

Naghatag sang tribute ang celebrities kasunod sang gulpyada nga kamatayon ni Vanessa Blanca nga amo ang female singer sa 2010s hit nga “DOTA O Ako.”

Kahapon sang ginkumpirma sang pamilya nga napatay si Vanessa sa edad nga 30-anyos kasunod sang aksidente sa sulod sang condominium sa Manila.

Lakip sa nagdumdom kay Vanessa amo ang iya kaupdanan sa pre-teen singing group nga Sugarpop nga sanday Julie Anne San Jose, Rita Daniela, Enzo Almario, kag Pocholo Bismonte.

Pahayag ni Julie Anne, naga-plano pa kuntani sila sang reunion.

“Wani, still can’t believe it… Plano pa naman natin mag-reunion. Sugarpop will never be the same without you. Rest in Heaven, Wani,” suno sa singer.

Gin-throwback man sang iban nga myembro ang ila pictures kag mga handumanan sa Sugarpop days.

Sa isa ka separado nga Facebook post, ginsiling sang pakaisa ni Vanessa nga si Ivy Ann Salaum Jubelag nga nagsuprer ang singer sang traumatic brain injury matapos nga natumba ini samtang yara sa CR.

Nangayo sila sang emergency assistance paagi sa pagtawag sang ambulansya.

Apang suno kay Ivy, pagkaligad sang 15 minutos, wala pa nag-abot ang ambulansya, gani gindala siya sang iya mga kaupdanan sa pinakamalapit nga ospital paagi sa wheelchair.

Pagahiwaton ang public viewing para kay Vanessa subong nga Agosto 21, alas-6 sang gab-i, sa Loyola Memorial Chapels sa Commonwealth, Quezon City.

Pinaka-kilala si Vanessa sa original version sang “DOTA O Ako” sang 2011 ilabi na sa Filipino fans sang amo nga online computer game nga DOTA sa kasagsagan sang popularidad sini sang 2010s.

Sa nagligad nga mga tinuig, nagpabilin nga aktibo si Vanessa music and online content bilang isa ka content creator kag vocal coach.