All-set na ang OPM iconic rock band nga Rivermaya para sa 7-city North America tour sa Septyembre kag Oktubre subong nga tuig.
Matapos ang ila madinalag-on nga reunion concert sang nagligad nga Pebrero, dal-on nanday Bamboo, Rico Blanco, Mark Escueta kag Nathan Azarcon ang ila nga classic hits sa Filipino fans sa United States kag Canada.
Para kanday Bamboo kag Blanco, ini nga once-in-a-lifetime reunion tour ang pat-od gid nga mangin “intimate, personal” kag syempre, madamo sang dapat paabuton nga sorpresa ang fans!
Lakip sa naanunsyo nga kadtuan sang banda amo ang Vancouver, Toronto, kag Alberta sa Canada; New York City sa USA; kag Temecula, Los Angeles, kag San Francisco sa California sa Estados Unidos.
Una na nga gin-anunsyo sang banda nga magluwas sa US kag Canada, may natalana man sila nga performance sa Middle East, Singapore, Australia kag London.
Sanday Bamboo, Mark, Nathan Azarcon kag Rico kaupod si Perf de Castro amo gid ang original members sang Rivermaya nga nangin popular umpisa sang 1994 bangud sa ila hit songs kaangay sang “214,” “Kisapmata,” “Elesi,” kag “Awit ng Kabataan.”
