ILOILO CITY – Luyag ipahangop sang Iloilo City Government sa mga pumuluyo sa syudad nga ang ginapatigayon nga road clearing operations ang direkta nga mandu ni Presidente Rodrigo Duterte kag Department of the Interior and Local Government (DILG) Secretary Eduardo Año.
Ini ang rason kun ngaa ginhingyo ang mga punong barangay sa syudad nga ipatapik sa vicinity sang ila lugar ang Memorandum Circular 2020-027 nga naga-unod sang direktiba sang DILG nga padayunon ang pag-implementar sang road clearing ukon Oplan Hawan.
Sa interview sang Bombo Radyo kay Executive Assistant for Brgy Affairs Mr. Boyet Rico, iya ginpahayag nga subong nga Pebrero, nakigsapol na si Mayor Jerry Treñas sa mga punong barangay agud diskusyunan ang 75-calendar-day-deadline sang pagpaninlo sa karsada kag sa tanan nga obstruction.
Ginpahayag ni Rico nga posible nagapang-alang-alang man ang pila ka mga punong barangay nga istriktuhan gid ang mga salawayon nga residente bangud nakulbaan sila nga maapektuhan sini ang ila pagpadalagan sa barangay election.
Suno pa sa opisyal, sulit-sulit na ang ila pagpahangop sa mga kabarangayan apang may mga residente gid nga wala nagatuman.
Subong nga adlaw, Pebrero 19, liwat nga ginbalikan sang Oplan Hawan Team ang tatlo ka barangay sa distrito sang Jaro — Brgy. San Isidro, Brgy. Benedicto, kag Brgy. Cubai.
Suno pa sa opisyal, magasugod na ang evaluation sa 34 ka non-compliant barangays antes pa man ang Abril 30.
Dugang pa ni Rico, magaserbe bilang evaluation team ang Philippine National Police (PNP), Bureau of Fire Protection (BFP), Department of the Interior and Local Government (DILG), Oplan Hawan Team kag lakip na ang pinili nga non-government organizations (NGOs) sa syudad.
