Naghingyo si House Speaker Ferdinand Martin Romualdez sa Department of Transportation nga i-extend ang implementasyon sang public utility vehicle (PUV) modernization program samtang wala pa natatapan sang gobyerno ang mga problema sang mga jeepney drivers kag operators.
Suno kay Romualdez, ginaduso niya ang mga lihok nga magahatag sang proteksyon sa palangabuhian sang mga jeepney drivers kaangay sang paghatag sang dugang nga ayuda agud may transition man sila sa bag-o nga mga salakyan.
Ini paagi sa masarangan nila nga “financiang options” kag paghatag man sang training programs agud nga maka-adoptar man sa bag-o nga teknolohiya.
Nagpahayag man ang house speaker nga hingyuon sini sa chairman sang House Committee on Transportation nga si Antipolo 2nd District Rep. Romeo Acop nga magpatigayon sang motu propio investigation sa reports nga may yara sang kurapsyon sa pagbalay kag pagplano sa implementasyon sang PUV modernization program.
Gin-mensyonar sini ang reports nga may mga transport officials nga nagpakighimbon sa anay mga opisyal agud makig-negosyar para mabuslan sang imported nga modern jeepney units ang mga daan ukon tradisyonal nga mga units.
Matandaan nga Disyembre 31, 2023 ang deadline sa franchise consolidation apang ginhatagan sang ligwa nga tubtub sa Enero 31, 2024 nga maka-operate ang unsolidated nga mga jeepney units sa mga lugar nga may manubo sa 60% nga consolidation rate.
