MANILA – Personal nga tun-an ni Presidente Rodrigo Duterte ang kontrobersyal nga anti-terrorism bill.
Suno kay Presidential Spokesperson Atty. Harry Roque, maid-id nga usisaon ni Duterte ang amo nga hagna agud makit-an ang mga wala nagasanto sa Konstitusyon.
Antes sini, una na nga ginkumpirma sang presidente sa iya public address sang Lunes sang gab-i nga yara pa sa legal team sang Malacañang ang nasambit nga Anti-Terrorism Bill.
Suno naman kay Roque, tanan nga ginaproponer nga legislation ang magaagi sa kritikal nga eksaminasyon sang Office of the Executive Secretary kag hulaton ni Duterte ang enrolled copy nga may rekomendasyon.
Pahayag ni Roque, santo sa naistorya si Duterte, isa tubtob duha ka adlaw ang gamiton agud makahimo siya sang desisyon kun ipasar na ang hagna sa isa ka layi.
Nahibaluan nga nakapasa naman sang review and recommendations ang Department of Justice sa Office of the President.
