ILOILO CITY – Liwat nga gin-athag sang COVID-19 team nga mga tawo lang kag byahero nga may essential nga trabaho kag tuyo ang mahimo makasulod sa syudad kadungan sang ipatuman nga border restrictions bwas, Mayo 26.
Sa interview sang Bombo Radyo kay Mr. Jeck Conlu, COVID-19 spokesperson sang Iloilo City Government, iya ginpahayag nga kinahanglan lang nga ipresentar ang Identification Card kun maglabay sa quarantine control points sa Iloilo City.
Ang qurarantine control points ukon ang identified nga entrance kag exit sang syudad ang yara sa Barangays Lanit, Tagbak, Bitoon, kag Ungka sa Jaro, Hibaoan sa Mandurriao, kag Mohon sa Arevalo.
May mga gindeploy man nga pulis nga amo nga istrikto nga maga-check sang IDs sang mga travelers antes sila makasulod sa syudad.
Una na nga nagpagwa sang advisory ang Philippine Coast Guard sa Iloilo City nga may suspension sang mga byahe padulong kag halin sa Bacolod City kag Negros Occidental.
Bangud magapabilin naman nga bukas ang pantalan sa Dumangas para sa sini nga mga pasahero, magasapol pa ang Iloilo City Government sa concerned agencies subong nga adlaw agud maplastar sang maayo ang mga pagsulundan kag masigurado nga indi makasulod sa syudad ang mga wala man sang essential nga transaction.
Lakip sa ipatawag sa pagsinapol subong nga aga amo ang tiglawas halin sa Philippine Ports Authority – Iloilo, PCG – Iloilo, kag Philippine National Police.
Indi makalusot sa quarantine control points suno kay Conlu ang mga non-essential travelers apang ginalauman man nga samtang yara pa lang sila sa departure area sa Bacolod City kag Negros Occidental, istrikto na ang otoridad sa paghibalo sang ila mangin tuyo sa Iloilo City.
