SC decision nga unconstitutional ang impeachment vs Sara, ginbaton sang mga kongresista

Hugot nga ginabaton sang pila ka myembro sang Kamara ang ruling sang Korte Suprema nga i-uphold ang nauna nga desisyon sini nga “unconstitutional” ang impeachment batok kay Vice President Sara Duterte.

Kahapon sang gin-anunsyo ni Supreme Court spokesperson Atty. Camille Ting nga nag-desisyon ang en banc sang may pinalidad nga ginabasura sini ang motion for reconsideration nga ginpasaka sang Kamara.

Suno kay House Committee on Justice chairperson kag Batangas 2nd District Rep. Gerville Luistro nga isa kuntani sa magapungko bilang prosecutor pananglitan nadayon ang impeachment, nakahanda na siya nga daan kun ano man ang desisyon sang Supreme Court sa ila nga mosyon.

Dapat batunon suno sa iya nga amo ini ang kahulugan sang rule of law. Dapat man dumdumon suno pa sa mamalidha nga ang Korte Suprema amo ang final arbiter sang tanan nga kontrobersiya nga nagapalibot sa implementasyon kag interpretasyon sang mga layi kag pagsulundan.

“Well, it’s quite frustrating. Just like what I hear from the rest of the 215, I guess, signatories of the first impeachment. But nonetheless, that is the meaning of the rule of law. We have to follow the decision of the Supreme Court,” suno sa abogada nga mamalidha.

Pahayag naman ni Bicol Saro party-list Rep. Terry Ridon, ginatahod nila ang desisyon sang Supreme Court. Apang kun makalampas suno sa iya ang one-year bar sa Pebrero 6, handa na liwat ang Kamara sa pagbaton kag paghulag pananglitan may bag-o nga impeachment complaint batok sa vice president.

Suno namam kay House Speaker Faustino “Bojie” Dy III, importante nga mangin mahinalungon sa proseso sang impeachment bangud naangot diri ang mabug-at nga mandato nga gintugyan sa ila sang mga Pilipino.

“The House of Representatives acknowledges the decision of the Supreme Court regarding the Articles of Impeachment against Vice President Sara Duterte,” suno kay Dy. “The impeachment is a process clearly stated by the Constitution, with a certain set of rules to follow. It is important to be very careful regarding the process of impeachment — a process associated with the heavy mandate entrusted to us by the Filipino people.”

Para naman kay Senior Deputy Speaker Ferdinand Hernandez, magapadayon ang Kamara nga nagasunod sa giya sang constitutional mandate kag committed sa pagsunod sa democratic principles, institutional respect, kag rule of law.

Ginpahangop naman ni House Deputy Minority Leader kag ML party-list Rep. Leila De Lima nga ang Supreme Court decision ang nagamuno lamang sa technicality sang impeachment kag indi sa merito sang impeachment case.

Ini nga grounds suno sa iya ang mahimo pa magamit sa masunod nga filing.

Bisan may desisyon ang Supreme Court suno sa iya, wala sang vindication nga natabo kag wala sang nalimpyuhan nga pangalan.

Nagpasalig naman sanday ACT Teachers Rep. Antonio Tinio, Gabriela Women Party Rep. Sarah Jane Elago kag Kabataan Rep. Renee Louise Co nga handa ang Makabayan bloc nga mag-file liwat sang impeachment complaint batok sa Vice President bangud kinahanglanon ini kag nakasandig sa interes sang mga Pilipino.#