Nagpangayo sang pasaylo si Senator Imee Marcos sa iya amay nga si anay Presidente Ferdinand Marcos, Sr. bangud wala sini nabantayan sang maayo ang iya manghod nga si President Ferdinand “Bongbong” Marcos Jr.
Ginpahayag ini sang senadora sa video message nga gin-release kadungan sang Lunes Santo. Ginbalikan sini ang iya natun-an sa iya amay nga sa kada Semana Santa, dapat nga magpatawad ukon magpangayo sang kapatawaran.
Diri kag iya ginbalikan ang masami nga bilin man sang former president nga bantayan sini ang iya utod.
“Ngayon iniisip ko na ang dapat ihingi ko ng tawad. Sa tatay ko, ihingi ko ng tawad na hindi ko nagampanan ‘yung utos niya, ‘yung habilin niya, paulit-ulit, hindi lang naman nung tumanda siya at mamamatay na, kundi talaga buong buhay yata namin—parating binibilin si Bongbong. ‘Bantayan mo yung kapatid mo.’ Parating sinasabing gano’n,” suno sa senadora.
“Hindi ko nabantayan eh… Kaya Dad, sinubukan ko talaga, pinagpilitan ko. Nayayamot na nga sa akin si Bongbong. Alam ko naman. Pero hindi ko talaga kinaya,” emosyonal nga pahayag ni Imee.
Nahibaluan nga halin sang nagligad nga mga tinuig, indi na maayo ang relasyon sang mag-utod nga Marcos bangud sa pulitika kag pila pa ka mga isyu. Sang 2025, matandaan nga ginpahayag pa sang senadora nga nagagamit sang iligal nga droga ang presidente. Ginsabat naman ini sang Malacañang kag gintawag nga “desperate.”
Ginhangkat man anay ni Imee ang First Family nga magpaidalom sa hair follicle drug test agud nga mabali ang iya akusasyon, kabaylo sang DNA test agud mabali naman ang rumors kaangot sa kun sin-o ang iya ginikanan.#
